Clubs and club activities

Clubs and club activities

У сучасным культурным жыцці краіны клубныя ўстановы застаюцца адным з асноўных сацыяльных інстытутаў, якія забяспечваюць захаванне, стварэнне і рас­паўсюджванне культурных каштоў­насцей, фарміруюць духоўныя запатра­баванні, ствараюць неабходныя ўмовы для сацыяльна­культурнай актыўнасці грамадзян, арганізацыі вольнага часу, павышаюць якасны ўзровень культурнага жыцця насельніцтва.

У сістэме Міністэрства культуры Рэспублікі Беларусь на 1 студзеня 2017 г. налічваюцца 2656 устаноў клубнага тыпу (статус юрыдычнай асобы маюць 186 устаноў), у тым ліку ў Брэсцкай вобласці — 496, Віцебскай — 426, Гомельскай — 548, Гродзенскай — 300, Магілёўскай — 378, Мінскай — 506, г. Мінск — 2.

У ходзе аптымізацыі і рэфармавання колькасць клубных устаноў у параўнанні з 2015 г. скарацілася на 116 адзінак (ці 4,3 %), а за апошнія 5 гадоў — на 633 адзінак (ці 19,2 %) (у Магілёўскай вобласці на 23,6 %, Гродзенскай — 23,5 %, Мінскай — 22,5 %, Віцебскай — 22,4 %, Брэсцкай — 20,6 %, Гомельскай — 18,2 %), што тлумачыцца сацыяльна­дэмагра­фічнымі працэсамі, у першую чаргу, паніжэннем колькасці сельскага насельніцтва. Трэба зазначыць невысокія тэмпы стварэння арганізацый культуры змешанага тыпу, а таксама наданне статусу юрыдычнай асобы клубнай установе.

Варта адзначыць Гомельшчыну, дзе павялічана колькасць устаноў не клубнага тыпу, якія займаюцца клубнай дзейнасцю. У той час, калі іншыя вобласці маюць тэндэнцыю названага паказчыка да памяншэння, Гомельская вобласць з 2011 г. павя­лічвае колькасць бібліятэк, устаноў адукацыі і іншых, якія займаюцца клубнай дзейнасцю. Колькасны паказчык выглядае наступным чынам: у 2011 г. — 703 установы, 2012 г. — 750, 2013 г. — 772, 2014 г. — 936, 2015 г. — 960 (гл. Дадатак, дыяграма Д 2.2).

Як і ў папярэднія гады культурнае абслугоўванне сельскіх населеных пунктаў, якія не маюць стацыянарных устаноў культуры, вырашалася за кошт нестацыянарных форм абслу­гоўвання — аўтаклубаў. Усяго ў рэспубліцы налічваюцца 100 аўтаклубаў. Трэба адзначыць, што не ва ўсіх раёнах яны створаны, што не дазваляе ў поўнай меры аказваць паслугі па культурнаму абслугоўванню ў сельскіх населеных пунктах. Адсут­нічаюць аўтаклубы ў 7 раёнах Гродзенскай вобласці (Бераставіцкі, Карэліцкі, Мастоўскі, Навагрудскі, Астравецкі, Свіславіцкі, Смаргонскі); 3 — Віцебскай (Бешанковіцкі, Верхнядзвінскі, Пастаўскі); 3 — Мінскай (Барысаўскі, Крупскі, Любанскі); 2 — Гомельскай (Нараўлянскі і Лельчыцкі); 1 — Брэсцкай (Камянецкі).

Скарачэнне клубаў адбілася на памяншэнні колькасці фарміраванняў і іх удзельнікаў. Усяго па рэспубліцы — 21 426 клубных фарміраванняў, у якіх задзейнічаны 223 080 чалавек. За год першы паказчык зменшыўся на 3,0 %, другі — амаль на 4,0 %. Аднак, напрыклад, у Магілёўскай вобласці, у цэлым колькасць фарміраванняў на адну клубную арганізацыю не змяншаецца (амаль 8) і нават мае тэндэнцыю да павелічэння (на 2,0 %) у параўнанні з мінулым годам (вышэйшы паказчык сярод рэгіёнаў). Невялікае павелічэнне захоўваецца ў Брэсцкай вобласці. Таксама варта зазначыць, што ў цэлым колькасць клубных фарміраванняў для дзяцей з улікам дзейнасці бібліятэк, метадычных арганізацый, устаноў адукацыі ў параўнанні з 2015 г. павялічылася на 643 (гл. Дадатак, дыяграма Д 2.9).

У 2016 г. праведзены 574 858 мерапрыемстваў. У параўнанні з 2015 г. іх колькасць павялічылася на 1,53 % (гл. калонку 7 табл.). Калі ж падлічыць долю мерапрыемстваў, якія праводзіліся ў 2016 г. у адной установе, то лідзіруюць Магілёўская і Гомельская вобласці, што адлюстравана ў апошняй калонцы (8) табліцы. Стабільна з года ў год павялічвае колькасць мерапрыемстваў Гомельшчына.

Табліца. Дынаміка колькасці праведзеных мерапрыемстваў па абласцях

На пачатак 2017 г. у рэспубліцы налічваюцца 1665 «народных» і «ўзорных» аматарскіх калектываў мастацкай творчасці (у 2016 г. найменне прысвоена 31 калектыву) і 98 «заслужаных» аматарскіх калектываў мастацкай творчасці (у 2016 г. — 5 калектывам). Гэта сведчыць аб высокім мастацкім узроўні аматарскіх калектываў, станоўчай дынаміцы павелічэння калектываў з найменнямі «народны» і «ўзорны», званнем «заслужаны аматарскі калектыў Рэспублікі Беларусь».

З 2014 г. павялічваецца і колькасць платных фарміраванняў па галіне: у 2014 г. — 918, у 2015 г. — 1017, у 2016 г. — 1118.

Год культуры патрабаваў актывізацыі клубнай дзейнасці, і культурнае жыццё ў шэрагу раёнаў выглядала насычаным і разнастайным. Асабліва выдзяляюцца міжнародныя мерапрыемствы, значны вопыт правядзення якіх маецца ў кожнай вобласці.

У Віцебскай вобласці традыцыйна праходзіць 9 міжнародных фестываляў, звыш 38 абласных свят і конкурсаў. Культурнай падзеяй года стаў Міжнародны фестываль мастацтваў «Славянскі базар у Віцебску», у рамках якога прайшлі розныя конкурсы, у тым ліку па лозапляценню «Лазовы прут», традыцыйнага касцюма «Сцяжкі майстэрства», у якіх прымалі ўдзел клубныя фарміраванні.

Калектывы мастацкай творчасці прадэманстравалі сваё майстэрства і на іншых міжнародных святах у рэгіёнах: традыцыйнай культуры «Браслаўскія зарніцы», у межах якога ўжо 5 год праходзіць Браслаўская харавая асамблея, турнір традыцыйных беларускіх побытавых танцаў; фестывалі песні і музыкі «Дняпроўскія галасы ў Дуброўна» са святам-конкурсам глінянай цацкі «Салавейка–2016»; фестывалях праваслаўных песна­пенняў «Каложскі Дабравест», славянскіх баявых мастацтваў (г. Гродна); пленэр ганчароў (в. Гарадная, Столінскі р-н) і інш.

Штогод прыцягвае пільную ўвагу грамадскасці Міжнародны форум «Традыцыйная культура як стратэгічны рэсурс устойлівага развіцця грамадства», які праводзіўся ў 5 раз у г. Магілёў. У ім прынялі ўдзел прадстаўнікі з 12 краін блізкага і далёкага замежжа: Грузіі, Арменіі, Славакіі, Харватыі, Казахстана, Расіі, Паўднёвай Карэі, Эстоніі, Італіі, Літвы, Турцыі, а таксама актыўнасцю вызначаюцца клубныя фарміраванні вобласці.

Гомельшчына парадавала высокім арганізацыйным і творчым узроўнем правядзення міжнародных фестываляў: харэагра­фічнага мастацтва «Сожскі карагод», этнакультурных традыцый «Кліч Палесся», конкурсаў «Музыка надзеі», «Мой сябра — баян» і інш.

Асобнага статусу заслугоўвае Рэспубліканскі фестываль нацыянальных культур, што сёлета праводзіўся ў 11 раз у г. Гродна. У заключных мерапрыемствах прынялі ўдзел творчыя калектывы каля 40 нацыянальнасцей.

З рэспубліканскіх мерапрыемстваў таксама вылучаюцца фестывалі беларускай песні і паэзіі, народнага гумару «Аўцюкі» (Калінкавіцкі р-н), фальклорнага мастацтва «Берагіня» (Акцябр­скі р-н), Дзень беларускага пісьменства ў Гомельскай вобласці і інш.

Значную актыўнасць клубныя фарміраванні праяўляюць на рэгіянальных узроўнях. На Магілёўшчыне папулярнасцю кары­стаўся абласны творчы праект «Фестываль народных талентаў Магілёўшчыны», прымеркаваны да Года культуры. Да таго ж праект рэалізоўваўся сумесна з Рэспубліканскім унітарным прадпрыемствам радыётэлецэнтр «Тэлерадыёкампанія “Магі­лёў”». У рамках праекта адбываліся штомесячныя творчыя прэзентацыі 21 раёна вобласці, якія прадугледжвалі святы творчасці, тэатралізаваныя і тэматычныя канцэрты, імпрэзы, выставы, а таксама тэатральныя гасціныя народных тэатральных калектваў вобласці.

Разнастайнасцю праграм вызначаюцца і іншыя рэгіёны.

На Гродзеншчыне — «Ганенскі кірмаш», IV абласны фестываль аўтарскай песні «Новае пакаленне» (г.п. Зэльва), рэгіянальны фестываль «Гальшанскі замак» у Ашмянскім раёне, абласны конкурс танцавальных калектываў «Скокі ва ўсе бокі» (г.п. Карэлічы), абласны адкрыты фестываль народнай творчасці «Аўгустоўскі канал у культуры трох народаў», адкрытае рэгіянальнае свята народнай творчасці «Аўгустоўскі канал запрашае сяброў» (Гродзенскі р­н), рэгіянальнае свята «Свіслацкі кірмаш» (г. Свіслач), адкрыты фестываль сыру (г. Гродна), фестываль нацыянальных культур «Суквецце сяброўства» (Лідскі р­н), ІІ адкрыты рэгіянальны фестываль батлеечных тэатраў «Чароўны свет батлейкі» (Смаргонскі р­н), адкрыты рэгіянальны фестываль­конкурс дзіцячых аматарскіх калектываў сельскіх устаноў культуры «Крышталікі запрашаюць» (ДУ «Бярозаўскі ГДК» Лідскага р­на), XVIII рэгіянальны фестываль­конкурс эстраднай песні «Адна зямля» (г. Астравец), адкрыты рэгіянальны фестываль «Паланэз–2016», адкрыты фестываль інтэлектуальных гульняў сярод каманд раённых цэнтраў і малых гарадоў «Кубак Волака і Вісека» (г. Ваўкавыск), адкрыты раённы фестываль радыё­кіраваных мадэлей «Бераставіца запрашае сяброў» (Бераставіцкі р­н), свята аматарскіх тэатральных калектываў «Тэатр — душа мая»;

на Брэстчыне — свята роднай мовы «Жывыя вытокі» (г. Брэст), фестываль­кірмаш «Дажынкі–2016» (г. Драгічын), фестываль сучаснага мастацтва «Эстрадны MIX» (г. Пружаны), свята народнага гумару «Спораўскія жарты» (в. Спорава, Бярозаўскі р­н), свята­конкурс інвалідаў па зроку «З песняй па жыцці» (г. Брэст), фестываль творчасці інвалідаў «Разам мы мацней» (г. Брэст), этнаграфічны канцэрт з цыкла «Рух зямлі» (г. Брэст), XIII абласны пленэр разьбяроў, прысвечаны 270­годдзю з дня нараджэння Т. Касцюшкі (в. Малыя Сяхновічы, Жабінкаўскі р­н);

на Магілёўшчыне — міжрэгіянальны фестываль­свята ама­тарскіх тэатраў «Тэатральныя вечарыны» (г.п. Краснаполле), раённы фестываль народнай творчасці і рамёстваў «Глушанскі хутарок» (п. Глуша, Бабруйскі р­н), рэгіянальны фестываль народнай творчасці, народных промыслаў і рамёстваў «Дрыбін­скія таржкі» (г.п. Дрыбін), рэгіянальнае свята сярэднявечнай культуры «Рыцарскі фэст» (г. Мсціслаў), рэгіянальны фестываль народнай творчасці «Веснавыя колеры» (г. Асіповічы), рэгія­нальны фестываль дзіцячай творчасці «Зоркі над Бесяддзю» (г.п. Хоцімск), міжрэгіянальнае свята­конкурс «Зялёныя святкі» (урочышча Байкава, Чавускі р­н), раённы фестываль «Гаспадарчы сыр», рэгіянальнае свята­фестываль «Спас — усяму час» (Слаўгарадскі р­н), міжрэгіянальнае свята «У госці да радзімічаў» (в. Радомля Чавускага р­на);

на Віцебшчыне — агляд­конкурс харэаграфічных калектываў «Прыдзвінскія карункі», прысвечаны заслужанаму дзеячу культуры Рэспублікі Беларусь І.А. Серыкаву, конкурс клубаў «Ветэран» і ветэранскіх творчых калектываў «Не старэюць душой ветэраны», свята паэзіі «Край мар маіх і думак светлых — мая радзіма Беларусь», спецыялізаваная выстава­кірмаш «Віцеб­шчына — за здаровы лад жыцця», свята аматарскіх аб’яднанняў «Яблычны фэст», творчы конкурс на лепшы аўтарскі верш «Мая зямля, мая Радзіма»;

у г. Мінск праведзена 7 гарадскіх фестываляў і конкурсаў самадзейнай мастацкай творчасці і інш.

З поспехам у рэгіёнах рэалізуюцца новыя формы клубнай работы. Напрыклад, на Міншчыне — шматпрофільны мала­дзёжны праект «Summer life», накіраваны на выяўленне таленавітай моладзі, арганізацыю адпачынку і вольнага часу дзяцей, падлеткаў і моладзі, выяўленне лідараў у маладзёжным асяроддзі (ДУК «Любанскі раённы цэнтр культуры»), фестываль маладзёжных субкультур «Энергія маладосці» (ДУК «Цэнтра­лізаваная клубная сістэма Вілейскага раёна»), гарадская квэст­гульня «Арыенцір: цэнтр культуры — бібліятэка» (ДУК «Нясвіжскі раённы цэнтр культуры» сумесна з ДУК «Нясвіжская цэнтральная раённая бібліятэка імя П. Пранузы»), раённы конкурс дзіцячага артыстызму сярод хлопчыкаў «Маленькі прынц» (ДУК «Цэнтралізаваная клубная сістэма Маладзечанскага раёна»), конкурсная шоу­праграма «Лэдзі­NEW СТАНДАРТ» (Слуцкі гарадскі палац моладзі), комплексныя культурна­забаўляльныя праграмы з арганізацыяй і правядзеннем гіста­рычных віктарын, рыцарскіх турніраў, сярэднявечных гульняў і забаў, майстар­класаў па сярэднявечных танцах (ваенна­гістарычны клуб «Крутагор’е» ДУ «Дзяржынскі раённы цэнтр культуры і народнай творчасці») і інш.

У Год культуры ў Віцебскай вобласці рэалізаваны новыя праекты: абласны турнір бытавых беларускіх танцаў, абласны конкурс ансамбляў барабаншчыц­мажарэтак, абласное свята­конкурс народнага касцюма, Міжнародны конкурс майстроў лозапляцення; свята тэматычных тэатралізаваных пляцовак брэндаў гарадоў і раёнаў вобласці, абласцей рэспублікі (23 гарады і раёны вобласці забяспечылі працу 23 тэматычных тэатра­лізаваных пляцовак, правялі 92 мерапрыемства, у якіх прынялі ўдзел 69 творчых калектываў з агульнай колькасцю ўдзельнікаў звыш 2 тысяч чалавек, што дазволіла стварыць брэндавы рэгіянальны прадукт і паслугі, заснаваныя на мясцовых культурных традыцыях, а таксама звязаных з выкарыстаннем гісторыка­культурных каштоўнасцей); мастацкі праект «Я малюю фестываль» (75 маладых мастакоў ва ўзросце ад 16 да 35 гадоў з Віцебскай і Смаленскай абласцей працавалі на 3 пляцоўках; стварылі на пленэры 123 творчыя працы і падарылі ў фонд фестывалю 96 карцін). Для маладых мастакоў праведзены майстар­класы мастака з Кітая Чэнь Мау па кітайскаму традыцыйнаму жывапісу; члена Саюза дызайнераў Расійскай Федэрацыі Т.І. Шутавай па роспісу па тканіне; Віцебскага мастака Ф.Ф. Гумена па акварэлі; заслужанага мастака Расійскай Федэрацыі В.І. Ляшэнкі — «Малюнак з натуры»); абласное свята­конкурс вакальна­інструментальных ансамбляў «ВІА­тон»; краязнаўчы праект «Сцяжынкамі Аляксея Сапунова» і фэст экскурсаводаў «Гісторыя Мазалава і ваколіц: ад маёнтка да аграгарадка Мазалава» Віцебскага раёна; праект «Этнарэабілітацыя» сумесна з Віцебскім дзяржаўным медыцынскім універсітэтам; «Фестываль дзвюх рэк» у Докшыцах; ахапіў усе жанры мастацтва абласны агляд­конкурс творчых калектываў вобласці, прысвечаны Году культуры, у якім прыняла ўдзел болей за 5000 чалавек (каля 500 творчых калектываў і 200 індывідуальных выканаўцаў) з усіх рэгіёнаў Віцебшчыны.

На Магілёўшчыне новымі культурнымі падзеямі рэгіёнаў сталі: эка­арт фестываль «Астравы Дулебы» (Клічаўскі р­н); раённы агляд­конкурс сярод клубных устаноў «Культура і моладзь» (Бабруйскі р­н); рэгіянальны фестываль «Битва ди­джеев» (Кіраўскі р­н); раённы конкурс побытавых танцаў (Клімавіцкі р­н). У Краснапольскім раёне праведзены два новыя раённыя творчыя праекты па захаванню і папулярызацыі культурнай спадчыны «Забытае ўваскрашаецца» і «Краснапольскі Арбат», апошні атрымаў ганаровы дыплом на ярмарцы мясцовых ініцыятыў, у рамках праекта «Частно­государственное партнерство в интересах устойчивого развития сельских районов Беларуси», які рэалізаваны Міжнародным фондам развіцця сельскіх тэрыторый.

Упершыню ў Дзятлаўскім раёне стартаваў раённы сельскагаспадарчы праект у аграгарадках «Дбайных людзей славім — вясёла час бавім», мэтай якога з’яўляецца папулярызацыя сельска­гаспадарчай працы, прафесій і побыту. У рамках праекта адбыліся раённыя святы лёну, касцоў, малака, рыбака, мёду, яблыкаў, бульбы і інш. Падобныя цыклы мерапрыемстваў прайшлі ў Лідскім, Гродзенскім, Шчучынскім, Слонімскім раёнах.

Штогод у Слонімскім раёне праводзіцца свята­конкурс «Дзень добры, суседзі!» (жыхары адной вёскі знаёмяцца з бытам, традыцыямі і таленавітымі людзьмі суседняй вёскі. У сваю чаргу тыя, хто прыязджае ў госці, прывозяць канцэртную праграму і спартыўную каманду. Дадзены вопыт быў пераняты і паспяхова ўкаранёны ва ўсіх раёнах Гродзенскай вобласці.

У 2016 г. перасоўнымі транспартнымі сродкамі — аўтаклубамі ў Брэсцкай вобласці здзейснены 2819 выездаў (у 2015 г. — 1888), абслужаны 954 маланаселеных і аддаленых пункты (у 2015 г. — 817). Праведзены 2659 мерапрыемстваў (у 2015 г. — 1769).

У іх зоне абслугоўвання на Віцебшчыне знаходзіцца звыш тысячы вёсак. Аўтаклубамі праведзены 3133 мерапрыемстваў (у 2015 г. — 2645). Адбыўся абласны агляд­конкурс на лепшую пастаноўку работы сярод аўтаклубаў па абслугоўванню сельскага насельніцтва.

У зоны абслугоўвання аўтаклубаў Магілёўскай вобласці ўваходзіць звыш 2400 маланаселеных і аддаленых пунктаў. За 2016 г. аўтаклубамі праведзена звыш 4500 культурных мера­прыемстваў. У сярэднім адзін аўтаклуб абслугоўвае 114 населеных пунктаў.

Асноўнымі формамі работы аўтаклубаў з’яўляюцца: канцэрт­ныя праграмы, вечары ўшаноўвання, віншавання юбіляраў, народныя абрады і святы, лялечныя спектаклі (батлейка); ушаноўванне камбайнёраў, правядзенне свят вёсак, сямейных мерапрыемстваў і інш.

Кожным аўтаклубам праводзяцца этнаграфічныя экспедыцыі па збору фальклорнага матэрыялу, арганізуюцца на падставе гэтых матэрыялаў культурна­пазнавальныя мерапрыемствы. Напрыклад, у Клічаўскім раёне на аснове матэрыялаў, сабраных спецыялістамі, былі адроджаны танцавальныя вечарыны на базе раённага дома культуры, у Касцюковіцкім раёне ў в. Муравілле адроджаны абрад «Закіданне зайца» падчас правядзення вясельных дзён.

Паляпшэнню культурнага абслугоўвання і арганізацыі вольнага часу сельскага насельніцтва спрыяў Рэспубліканскі фестываль «Майстры мастацтваў — працаўнікам вёскі» (адбыліся канцэртныя праграмы: у Слуцкім р­не Мінскай вобл. — з удзелам заслужанага калектыву Рэспублікі Беларусь ансамбля народнай музыкі «Бяседа»; Камянецкім р­не Брэсцкай вобл. і ў Петры­каўскім р­не Гомельскай вобл. — з удзелам беларускага ан­самбля народнай музыкі «Свята»; Крычаўскім р­не Магілёўскай вобл. — з удзелам заслужанага калектыву Рэспублікі Беларусь Дзяр­жаўнага ансамбля танца Беларусі; Лідскім р­не Гродзенскай вобл. і Сеннінскім р­не Віцебскай вобл. — з удзелам Нацыянальнага акадэмічнага народнага хору Рэспублікі Беларусь імя Г. Цітовіча).

З мэтай павышэння ведаў па актуальных пытаннях дзейнасці арганізацый культуры і іх метадычнага забеспячэння Інстытут культуры Беларусі правёў семінары «Узаемадзеянне арганізацый культуры ў сферы народнай творчасці», «Фандрайзінг: як знайсці сродкі для развіцця культуры», «Культурная спадчына і ўстойлівае развіццё тэрыторый», V Міжнародную навукова­практычную канферэнцыю «Культура Беларусі: рэаліі сучасна­сці»; выпусціў шэраг дапаможнікаў: «Актуальныя аспекты культурна­адпачынкавай дзейнасці ў аграгарадках і сельскай мясцовасці», «Эканоміка і менеджмент у сферы культуры», «Купальскі спеўнік», «Радзіма мая дарагая», «Сучасная дадатковая адукацыя дарослых у сферы культуры», Сурус Р. «Звук одухотворённый: произведения для деревянных духовых инструментов» і інш.

Немалаважнай акалічнасцю ў любой паспяховай дзейнасці з’яўляецца яе стымуляванне. Прыклад для пераймання — сістэма маральнага і матэрыяльнага заахвочвання суб’ектаў культурнай дзейнасці, якая спрыяе развіццю культуры і мастацтва Віцебшчыны. Абласны выканаўчы камітэт заснаваў штогадовыя прэміі за высокія творчыя дасягненні ў галіне культуры і мастацтва сярод работнікаў культуры па 8 намінацыях у памеры 20 базавых велічынь кожная, сярод устаноў культуры і навучальных устаноў мастацтва вобласці па 8 намінацыях у памеры 840 базавых велічынь і інш.

У Год культуры поспехам могуць ганарыцца многія калектывы арганізацый культуры. Калектыву дзяржаўнай установы «Палац культуры г. Маладзечна» прысуджана спецыяльная прэмія Прэзідэнта Рэспублікі Беларусь за значны ўклад у развіццё самадзейнай мастацкай творчасці, у тым ліку арганізацыю дзейнасці 35 аматарскіх калектываў, з якіх 12 маюць званні «заслужаны аматарскі калектыў Рэспублікі Беларусь», «народны» і «ўзорны», правядзенне больш як 100 мерапрыемстваў у рамках Рэспубліканскай акцыі «Культурная сталіца года». Пераможцамі Рэспубліканскага конкурсу «Чалавек Года культуры» (сярод работнікаў культуры) у намінацыі «Клубная дзейнасць» стаў дырэктар установы культуры «Магілёўскі абласны метадычны цэнтр народнай творчасці і культурна­асветнай работы» А.Ф. Хмялькоў, у намінацыі «Народнае дэкаратыўна­прыкладное мастацтва» — народны майстар, дырэктар Дома рамёстваў і фальклору ДУК «Цэнтр традыцыйнай культуры і народнай творчасці Гарадоцкага раёна» Віцебскай вобласці.

Сярод асноўных задач у 2017 г. вылучаюцца наступныя:

• упарадкаванне сеткі клубных устаноў і наданне ім статусу юрыдычнай асобы;
• стварэнне арганізацый культуры змешанага тыпу, якія аказваюць насельніцтву адначасова некалькі відаў культурных па­слуг;
• забеспячэнне насельніцтва сельскіх населеных пунктаў, якія не маюць стацыянарных устаноў культуры, паслугамі спецыя­лізаваных перасоўных транспартных сродкаў (аўтаклубаў);
• захаванне колькасці існуючых клубных фарміраванняў, у тым ліку непрафесійных (аматарскіх) калектываў мастацкай твор­часці.